దీంతో ప్రజలు ఎవరి మాట నమ్మాలో తెలియని పరిస్థితి ఏర్పడింది. ప్రభుత్వంలో ఉన్న ఆర్థిక మంత్రిది ఒకమాట, ముఖ్యమంత్రి కేసీఆర్ ది మరోబాట అయితే ఎలా అని మరికొందరు విమర్శిస్తున్నారు. ఇక ఇక్కడే మరో ప్రశ్న తలెత్తుతోంది. ప్రస్తుతం ఉన్న పరిస్థితిల్లో కేంద్రంతో సఖ్యతగా ఉండక తప్పదని.. తప్పని పరిస్థితిల్లోనే సీఎం ఇలా మాట్లాడుతున్నారని పార్టీలో గుసగుసలు వినిపిస్తున్నాయి.

మిషన్ భగీరథ, మిషన్ కాకతీయ ప్రాజెక్టులకు సైతం జీఎస్టీనుంచి మినహాయింపులివ్వకపోవడంతో తెలంగాణకు ఆర్థిక ఇబ్బందులు పెరగవచ్చని ఓపక్క చెబుతూనే మరోవైపు జీఎస్టీ వల్ల తమకు అనూహ్యమైన ప్రయోజనాలు కలుగుతాయంటూ చెప్పడం ఎందుకు అంటు ప్రశ్నిస్తున్నారు రాజకీయ విశ్లేషకులు. ఇక ప్రజల నుంచి మాత్రం ఈ కొత్తపన్నుల వ్యవస్థవల్ల తమకు అన్యాయం జరుగుతోందంటూ తెలంగాణ ప్రభుత్వానికి పెద్ద ఎత్తున ఫిర్యాదులు వెల్లువెత్తుతున్నాయి. ముఖ్యంగా గ్రామీణ, సెమీ అర్బన్ ప్రాంతాలతోపాటు చిన్న చిన్న పట్టణాలనుంచి 70శాతం ఫిర్యాదులు నమోదయ్యాయి. మిగతా 30 శాతం జీహెచ్ఎంసీ పరిధినుంచే వచ్చాయి. బీడీ పరిశ్రమ, వస్త్ర పరిశ్రమ కుదెలయ్యే పరిస్థితి ఉందని కార్మికులు ఆరోపిస్తున్నారు. జీఎస్టీని సాకుగాచూపి వ్యాపారులు అధిక ధరలు వసూలు చేస్తున్నారని ఫిర్యాదులు అందుతున్నాయి. ఇంత జరుగుతున్నా.. ఆర్థిక మంత్రి మొత్తుకుంటా ఉన్నా ముఖ్యమంత్రి మాత్రం జీఎస్టీకే ఓటు వేస్తున్నారు.